सोनतळी वनविभाग रोपवाटिकेवरील दरोड्यातील ६१ लाखांचा मुद्देमाल जप्त

कोल्हापूर प्रतिनिधी
सोनतळी येथील वनविभागाच्या रोपवाटिकेवरील टाकण्यात आलेल्या दरोड्यातील ६१ लाखांचा मुद्देमाल स्थानिक गुन्हे अन्वेषण शाखेने जप्त केला आहे. या प्रकरणी मच्छीन्द्र विलास बनसोडे (वय ३०, रा. गणेशवाडी, रेठरे बुद्रुक ता. कराड), संतोष सुग्रीव खुर्द (वय ३५, रा. देगांव, ता. पंढरपूर), इरफान अजीज बेग (वय ४०, रा. वासदुर्गा, कर्नाटक) यांना अटक करण्यात आल्याची माहिती पोलीस अधीक्षक संजय मोहिते यांनी पत्रकार परिषदेत दिली.  यावेळी अपर पोलीस अधीक्षक सुहेल शर्मा आणि शहर उप अधीक्षक प्रशांत अमृतकर उपस्थित होते. सुरक्षारक्षकांना बेदम मारहाण करून त्यांचे हात-पाय बांधून दरोडेखोरांनी येथे ठेवण्यात आलेले १०० किलो चंदन तेल आणि चंदनाचे लाकूड लंपास केले होते. ते त्यांनी कोबीच्या व कांद्याच्या मालाखाली कराडमधील चोरलेल्या एका टेंपो मध्ये लपवून नेला जात असताना पोलिसांनी तो टेम्पो मालासह पकडला. पोलीस निरीक्षक दिनकर मोहिते, दिलीप जाधव यांचेसह स्थानिक गुन्हे अन्वेषण शाखेने शिताफीने बनसोडे, खुर्द, बेग यांना अटक करून त्यांच्याकडून १०० किलो चंदन तेल व ६४ किलोचे चंदनाचे लहान मोठे तुकडे असा एकूण ६१ लाखांचा मुद्देमाल जप्त करणेत आला आहे.